Gujarat Earthquake: રવિવારે સાંજે ગુજરાતમાં ભૂકંપના જોરદાર આંચકા અનુભવાયા હતા. અધિકારીઓએ જણાવ્યું કે ગુજરાતના કચ્છ જિલ્લામાં રવિવારે સાંજે 4.45 કલાકે ભૂકંપ આવ્યો હતો. આ ભૂકંપની તીવ્રતા રિક્ટર સ્કેલ પર 4.0 નોંધવામાં આવી હતી. ભૂકંપના કારણે જાનમાલના નુકસાનના કોઈ સમાચાર નથી. ઇન્સ્ટિટ્યૂટ ઓફ સિસ્મોલોજીકલ રિસર્ચ (ISR) અનુસાર, ભૂકંપનું કેન્દ્ર કચ્છ જિલ્લાના ભચાઉ નજીક હતું.
ISRએ જણાવ્યું હતું કે ભૂકંપ રવિવારે સાંજે 4:45 કલાકે નોંધાયો હતો, તેનું કેન્દ્ર ભચાઉના ઉત્તર-ઉત્તરપશ્ચિમ (NNW) લગભગ 21 કિમી દૂર હતું. કચ્છના કલેક્ટર અમિત અરોરાએ જણાવ્યું હતું કે ભૂકંપના કારણે જાનમાલના નુકસાનના કોઈ સમાચાર નથી. કચ્છ જિલ્લો હાઇ રિસ્ક સિસ્મિક ઝોનમાં આવેલો છે. જિલ્લામાં ઓછી તીવ્રતાના ભૂકંપના આંચકા અવારનવાર આવે છે. વર્ષ 2001માં કચ્છ જિલ્લામાં એક મોટો ભૂકંપ આવ્યો હતો. લગભગ 13,800 લોકો માર્યા ગયા જ્યારે 1.67 લાખ લોકો ઘાયલ થયા.
તમને જણાવી દઈએ કે આજે જાપાનમાં પણ ભૂકંપના આંચકા અનુભવાયા હતા. જાપાનની હવામાન એજન્સીએ જણાવ્યું કે રવિવારે સવારે ટોક્યો, કાનાગાવા પ્રીફેક્ચર અને આસપાસના વિસ્તારોમાં ભૂકંપના આંચકા અનુભવાયા હતા. સ્થાનિક સમય અનુસાર સવારે 8:59 વાગ્યે ભૂકંપનો આંચકો અનુભવાયો હતો. એજન્સી અનુસાર, આ ભૂકંપની તીવ્રતા રિક્ટર સ્કેલ પર 4.8 નોંધવામાં આવી હતી. ભૂકંપનું કેન્દ્ર ટોકિયો ખાડીમાં 80 કિલોમીટરની ઉંડાઈએ હતું.